शहापुरातील आरोग्याचा प्रश्न सुटणार; `या` ठिकाणी होणार नवीन आरोग्य केंद्र

ठाणे :  ठाणे जिल्ह्यातील आदिवासी दुर्गम भाग म्हणून शहापूर तालुक्‍याकडे पाहिले जाते. या भागातील नागरिकांना उत्तम आरोग्य सुविधा मिळावी यासाठी शिरोळे आरोग्य उपकेंद्राचे आरोग्य केंद्रात रूपांतर करण्याची मागणी नागरिकांकडून करण्यात येत होती. या मागणीची दाखल घेत या आरोग्य केंद्र बाबतचा प्रस्ताव राज्याच्या आरोग्य विभागाकडे सादर करण्यात आला आहे. या प्रस्तावास मंजुरी मिळताच शिरोळ आणि परिसरातील 15 गावपाड्यातील 22 हजार 271 नागरिकांना उत्तम आरोग्य सुविधा मिळू शकणार आहे. 
ठाणे जिल्ह्यातील आदिवासी दुर्गम भागातील शहापूर तालुक्‍याची लोकसंख्या चार लाख 55 हजार 309 इतकी आहे. त्यानुसार या तालुक्‍यात सध्या आठ आरोग्य केंद्र, एक ग्रामीण रुग्णालय आणि एक उपजिल्हा रुग्णालय आहे. असे असले तरीही तालुक्‍यातील शिरोळ या दुर्गम परिसरात वाहतुकीच्या साधनांचा अभाव असल्यामुळे या भागातील नागरिकांना आरोग्याच्या सुविधा मिळण्यास अडचणींचा सामना करावा लागत आहे.

तो' व्हिडिओ डोंबिवलीतील नव्हेच; व्हायरल व्हिडिओचं सत्य अखेर उघड... 

शहापूर तालुक्‍यातील शिरोळ हे गाव अतिशय दुर्गम भागात असून या गावाची लोकसंख्या 838 इतकी आहे; तर आसपासच्या 15 गावांची लोकसंख्या 22 हजार 271 इतकी असून दिवसागणिक ही लोकसंख्या वाढू लागली आहे. या गावापासून कसारा आरोग्य केंद्रापासून 10 किमी, तर ग्रामीण रुग्णालयापासून 12 किमी आणि शहापूर उपजिल्हा रुग्णालयापासून 31 किमी लांब आहे. त्यामुळे शिरोळ गावात असणाऱ्या उपकेंद्राचे रूपांतर आरोग्य केंद्रात करण्याची मागणी येथील नागरिकांकडून अनेक वर्षापासून करण्यात येत होती. त्याचबरोबर जिल्हा परिषदेसह आरोग्य समिती यांच्याकडून देखील या भागात आरोग्य केंद्र उभारण्याची मागणी करण्यात येत होती. 

मुख्यमंत्र्यांच्या स्टिअरींच्या विधानांनंतर उद्धव ठाकरेंना वाढदिवसाच्या शुभेच्छा देताना अजित पवारांकडून सूचक फोटो ट्विट

- 4 कोटी रुपये खर्च अपेक्षित 
ठाणे जिल्ह्यात कोरोना या आजाराने थैमान घातलेले आहे. त्या पार्श्‍वभूमीवर येथील नागरिकांकडून करण्यात येणाऱ्या आरोग्य केंद्र उभारणीच्या मागणीची दखल घेत, शिरोळ उपकेंद्राला आरोग्य केंद्र करण्याचा प्रस्ताव राज्य शासनाकडे पाठविण्यात आला. या आरोग्य केंद्रासाठी चार कोटी रुपयांच्या खर्चाचा प्रस्ताव तयार करण्यात आला आहे. त्याचबरोबर येथे दोन वैद्यकीय अधिकारी, दोन आरोग्य सहाय्यक, सहाय्यक परिचारिका, प्रसविका, प्रयोगशाळा तंत्रज्ञ, मिश्रक यांच्यासह 15 पदांची या केंद्रात आवश्‍यकता आहे. 

अंतराचे निकष शिथिल करण्याची मागणी 
सध्या शिरोळ या परिसरात 22 हजार 271 इतकी लोकसंख्या असून ही लोकसंख्या 2011 च्या जनगननेनुसार आहे. त्यात वाढत्या शहरीकरणामुळे या भागातील लोकसंख्येत वाढ होत आहे. तसेच या भागातील दोन आरोग्य केंद्रामधील अंतर 10 किमी असले तरी हा भाग अतिशय दुर्गम असल्यामुळे व कच्चे रस्ते असल्यामुळे जवळचे आरोग्य केंद्र गाठण्यासाठी बराच वेळ लागतो. त्यामुळे 10 किमीच्या अंतराचे निकष शिथिल करून या केंद्रासाठी शासनाने योग्य निर्णय घेऊन नागरिकांना दिलासा द्यावा, अशी मागणी राजेश घनघाव यांनी केली.  

 

New health care center in Shahapur taluka